अमेरिका–इराण युद्धाच्या पार्श्वभूमीवर सांगोल्यात प्रशासन सतर्क पोलीस निरीक्षक विनोद घुगे यांनी गॅस एजन्सी चालकांची घेतली बैठक; अवैध विक्री व साठेबाजीवर कडक कारवाईचा इशारा.

अमेरिका–इराण युद्धाच्या पार्श्वभूमीवर देशभरात इंधन व घरगुती गॅस पुरवठ्याबाबत खबरदारी घेतली जात असताना सांगोला तालुक्यातही प्रशासन सतर्क झाले आहे. त्याच अनुषंगाने आज दि. १३ मार्च २०२६ रोजी सांगोला पोलीस ठाणे येथे पोलीस निरीक्षक विनोद घुगे यांच्या अध्यक्षतेखाली सांगोला पोलीस ठाणे हद्दीतील सर्व घरगुती गॅस एजन्सी चालक व मालकांची महत्त्वपूर्ण बैठक आयोजित करण्यात आली.

या बैठकीत नागरिकांना घरगुती गॅस पुरवठा सुरळीत व पारदर्शक पद्धतीने व्हावा यासाठी विविध सूचना देण्यात आल्या. गॅस सिलेंडरचे वितरण केवळ अधिकृत बुकिंगधारकांनाच त्यांच्या बुकिंगनुसार करावे, कोणत्याही परिस्थितीत नियमबाह्य पद्धतीने गॅस सिलेंडर विक्री करू नये, असे स्पष्ट निर्देश देण्यात आले.

तसेच काही ठिकाणी गॅस सिलेंडरची साठेबाजी करून जादा दराने विक्री करणे, अनधिकृतपणे सिलेंडरचा पुरवठा करणे किंवा एजन्सीच्या नावाचा गैरवापर करणे असे प्रकार आढळल्यास संबंधितांवर कठोर कायदेशीर कारवाई करण्यात येईल, असा इशारा यावेळी देण्यात आला. नागरिकांच्या दैनंदिन जीवनाशी संबंधित असलेल्या घरगुती गॅस पुरवठ्यात कोणत्याही प्रकारचा गैरप्रकार किंवा अडथळा सहन केला जाणार नाही, असेही पोलीस निरीक्षक विनोद घुगे यांनी स्पष्ट केले.

याशिवाय सांगोला परिसरात गॅस वितरणावर प्रभावी नियंत्रण राहावे आणि नियमांचे काटेकोर पालन व्हावे यासाठी सांगोला पुरवठा अधिकाऱ्यांच्या पथकास मदत म्हणून एक अधिकारी व चार अंमलदार उपलब्ध करून देण्यात आले आहेत. हे पथक वेळोवेळी विविध गॅस एजन्सींची पाहणी करून गॅस वितरणाची स्थिती तपासणार असून कोणताही गैरप्रकार आढळल्यास तत्काळ कारवाई करण्यात येणार आहे.

दरम्यान, संभाव्य अफवा, कृत्रिम टंचाई किंवा जादा दराने गॅस विक्री रोखण्यासाठी प्रशासनाने ही बैठक घेतल्याचे सांगण्यात आले. नागरिकांनीही अफवांवर विश्वास न ठेवता गॅसचे अनावश्यक साठेबाजी करू नये, तसेच कुठेही अवैध विक्री किंवा साठेबाजी होत असल्याचे आढळल्यास त्वरित पोलीस किंवा पुरवठा विभागाला माहिती द्यावी, असे आवाहनही यावेळी करण्यात आले.

या बैठकीमुळे सांगोला तालुक्यात घरगुती गॅस पुरवठा सुरळीत ठेवण्यासाठी प्रशासनाने वेळेवर खबरदारी घेतल्याचे स्पष्ट झाले असून नागरिकांच्या हितासाठी कडक उपाययोजना करण्यात येणार असल्याचे संकेत मिळत आहेत.