सांगोला तालुक्यात लाचलुचपत प्रतिबंधक विभागाची कारवाई; मंडल अधिकारी व चालक अडचणीत.
सांगोला : शेतजमिनीच्या खरेदीची नोंद सातबारा उताऱ्यावर लावण्यासाठी लाचेची मागणी केल्याप्रकरणी लाचलुचपत प्रतिबंधक विभागाने (एसीबी) सापळा रचून मंडल अधिकाऱ्यांच्या खासगी वाहन चालकास रंगेहात पकडले. या प्रकरणी मंडल अधिकारी आणि त्यांचा चालक अशा दोघांविरुद्ध गुन्हा दाखल करण्यात आला आहे.
याबाबत अधिक माहिती अशी की, तक्रारदार विनोद सिताराम सातपुते यांनी त्यांच्या आईच्या नावावर खरेदी केलेल्या शेतजमिनीच्या खरेदी दस्तावर आलेल्या हरकतीचा निकाल त्यांच्या बाजूने लावून सातबारा उताऱ्यावर नाव नोंद करण्यासाठी सांगोला तहसील कार्यालयातील मंडल अधिकारी श्रीमती विजया महारूद्र नाईक यांनी त्यांच्या खासगी वाहन चालकाच्या मार्फत 10 हजार रुपयांची लाच मागितली होती. तडजोडीअंती ही रक्कम 7 हजार रुपयांवर निश्चित करण्यात आली.
या संदर्भात तक्रारदारांनी लाचलुचपत प्रतिबंधक विभाग, सोलापूर यांच्याकडे तक्रार दिल्यानंतर 5 मार्च 2026 रोजी संगेवाडी येथील मंडल अधिकारी कार्यालयात पडताळणी व सापळा कारवाई करण्यात आली. या कारवाईदरम्यान चालक वैभव पिराजी मोरे (वय 28, रा. मुंढेवाडी ता. पंढरपूर) याने तक्रारदारांकडून 7 हजार रुपयांची लाच स्वीकारताना पंचासमक्ष रंगेहात पकडण्यात आले.
या प्रकरणी मंडल अधिकारी श्रीमती विजया महारूद्र नाईक (वय 45) व चालक वैभव पिराजी मोरे यांच्याविरुद्ध भ्रष्टाचार प्रतिबंधक कायदा कलम 7-अ व 12 प्रमाणे सांगोला पोलीस ठाण्यात गुन्हा दाखल करण्यात आला आहे.
कारवाईदरम्यान 7 हजार रुपये रोख रक्कम, आरोपीचा शर्ट, सापळा कारवाईचे मेमरी कार्ड तसेच दोन्ही आरोपींचे व्हिवो कंपनीचे मोबाईल जप्त करण्यात आले आहेत.
या प्रकरणाचा पुढील तपास लाचलुचपत प्रतिबंधक विभागाचे पोलीस निरीक्षक शैलेश पवार करीत आहेत.
कोणत्याही टिप्पण्या नाहीत:
टिप्पणी पोस्ट करा