डिजिटल मीडियाच्या गोव्यातील राष्ट्रीय अधिवेशनासाठी ग्रामविकासमंत्री जयकुमार गोरे यांना निमंत्रण*

*डिजिटल मीडियाच्या गोव्यातील राष्ट्रीय अधिवेशनासाठी ग्रामविकासमंत्री जयकुमार गोरे यांना निमंत्रण*

डिजिटल मीडिया संपादक पत्रकार संघटनेच्या वतीने गोवा येथे आयोजित करण्यात येत असलेल्या तिसऱ्या राष्ट्रीय अधिवेशनानिमित्त राज्याचे ग्रामविकास मंत्री जयकुमार गोरे यांना निमंत्रण पत्रिका देण्यात आली.

गेल्या पाच वर्षांपासून डिजिटल मीडिया क्षेत्रात अविरत कार्यरत असलेली ही संघटना आता राष्ट्रीय स्तरावर पोहोचली आहे. महाराष्ट्र, कर्नाटक, गोवा, दिल्ली, मध्य प्रदेश, आंध्र प्रदेश आणि तेलंगणा या सात राज्यांत विस्तारलेल्या या संघटनेचे तब्बल १५ हजारांहून अधिक सक्रिय सभासद आहेत. संघटनेचे तिसरे राष्ट्रीय अधिवेशन पणजी (गोवा) येथे पार पडणार असून, या अधिवेशनासाठी प्रमुख मान्यवरांपैकी एक म्हणून ग्रामविकास मंत्री जयकुमार गोरे यांना निमंत्रित करण्यात आले आहे.

यावेळी संघटनेचे राज्य महासचिव विकास भोसले, पश्चिम महाराष्ट्र उपाध्यक्ष धनंजय पानसांडे, सहसचिव लिंगराज साखरे, सातारा जिल्हाध्यक्ष संतोष शिराळे, जिल्हा उपाध्यक्ष फिरोज तांबोळी, जिल्हा संपर्कप्रमुख एकनाथ वाघमोडे, माण तालुकाध्यक्ष नितीन वाघमोडे, खजिनदार संदीप जठार यांच्यासह इतर पदाधिकारी उपस्थित होते.

अजनाळे येथे अमानवीय कृत्य ,मतिमंद महिलेवर अत्याचाराचा प्रयत्न; आरोपी विजय कोळवले विरुद्ध गुन्हा दाखल

 अजनाळे येथे अमानवीय कृत्य ,मतिमंद महिलेवर अत्याचाराचा प्रयत्न; आरोपी विजय कोळवले विरुद्ध गुन्हा दाखल 

 सांगोला ;सांगोला तालुक्यातील अजनाळे गावात घडलेल्या संतापजनक प्रकाराने संपूर्ण परिसर हादरून गेला आहे. मानसिकदृष्ट्या दुर्बल असलेल्या एका महिलेशी अत्यंत निर्लज्जपणे गैरवर्तन करण्यात आल्याची धक्कादायक घटना उघडकीस आली आहे.

दि. ५ एप्रिल २०२६ रोजी दुपारी सुमारे १ वाजण्याच्या सुमारास विजय विठ्ठल कोळवले या व्यक्तीने पीडित महिलेच्या घरात जबरदस्तीने प्रवेश केला. त्या वेळी महिला एकट्याच असल्याची संधी साधत आरोपीने घरात घुसून अमानुष कृत्य केले. स्वतःचे कपडे काढत पीडितेचे कपडे काढून तिच्या लज्जेचा भंग केल्याचा गंभीर आरोप करण्यात आला आहे.

या प्रकाराची माहिती शेजारील महिलेच्या लक्षात आल्यानंतर हा प्रकार उघडकीस आला. त्यानंतर फिर्यादीने तात्काळ घटनास्थळी धाव घेतली. पीडितेकडून विचारपूस केल्यानंतर संपूर्ण प्रकार समोर आला असून तक्रार दाखल करण्यात आली आहे.

या प्रकरणी आरोपी विजय विठ्ठल कोळवले याच्याविरुद्ध भारतीय न्याय संहिता २०२३ अंतर्गत कलम ७४ व ७६, अनुसूचित जाती-जमाती अत्याचार प्रतिबंधक अधिनियम १९८९ अंतर्गत कलम ३(१)(w)(i) तसेच अपंग व्यक्तीचे अधिकार अधिनियम २०१६ अंतर्गत कलम ९२ नुसार गुन्हा दाखल करण्यात आला आहे.

घटनेनंतर अजनाळे गावात संतापाची तीव्र लाट उसळली असून आरोपीवर तात्काळ व कठोर कारवाईची मागणी जोर धरत आहे. पोलिसांकडून या प्रकरणाचा सखोल तपास सुरू असून पीडित महिलेला न्याय मिळवून देण्याचे प्रयत्न सुरू आहेत.

होलार समाज पुरोगामी सामाजिक संघटनेच्या नूतन सचिव पदी बिरू भंडगे यांची तर उपाध्यक्षपदी विठ्ठल गेजगे यांची एकमताने निवड

 होलार समाज पुरोगामी सामाजिक संघटनेच्या नूतन सचिव पदी बिरू भंडगे  यांची तर उपाध्यक्षपदी विठ्ठल गेजगे यांची एकमताने निवड 

होलार समाज पुरोगामी सामाजिक संघटना तालुका सांगोला सदर संघटनेची बैठक दिनांक ५/४/२०२६ रोजी लोकप्रिय आमदार डॉ. बाबासाहेब देशमुख यांच्या कार्यालयात खेळीमेळीच्या वातावरणात पार पडली. सदर बैठकीत पदाधिकारी यांची नेमणूक करण्यात आली त्यामध्ये सचिव या पदावर मा. श्री. बिरू भंडगे (पाचेगाव खुर्द) यांची तर उपाध्यक्ष पदावर मा.श्री. विठ्ठल गेजगे (वाटंबरे) यांची नियुक्ती करण्यात आली. 

या निवडीला सर्वानुमते अनुमोदन देण्यात आले. या कामे प्रास्ताविक संघटनेचे कार्याध्यक्ष मा.श्री.कुंडलिक भंडगे यांनी केले. संघटनेचे अध्यक्ष मा. मुख्याध्यापक श्री. मानाप्पा भडंगे , उपाध्यक्ष मा. श्री. विजय ऐवळे (चिंचोली), कार्याध्यक्ष मा.श्री. कुंडलिक भंडगे(अजनाळे), नूतन उपाध्यक्ष मा.श्री. विठ्ठल गेजगे(वाटंबरे), सहसचिव ह.भ.प. केशव हेगडे (सोनलवाडी), सदस्य मा.श्री.धनंजय भडंगे, मा.श्री. नारायण भंडगे आदी समाजाचे पदाधिकारी उपस्थित होते. संघटनेचे आधारस्तंभ लोकप्रिय आमदार मा. डॉ. बाबासाहेब देशमुख यांच्या उपस्थितीत नूतन पदाधिकाऱ्यांची निवड करण्यात आली. सदर बैठक उत्साहात पार पडली व संघटनेच्या भावी कार्यास आमदारांनी शुभेच्छा दिल्या. आभार संघटनेचे अध्यक्ष मा. मुख्याध्यापक श्री. मानाप्पा भडंगे यांनी केले.

स्व.आमदार काकासाहेब साळुंखे पाटील आणि भगवतभक्त शारदादेवी साळुंखे पाटील यांच्या स्मारकाला पालकमंत्री मा. ना. जयकुमारजी गोरे यांनी केले अभिवादन

स्व.आमदार काकासाहेब साळुंखे पाटील आणि भगवतभक्त शारदादेवी साळुंखे पाटील यांच्या स्मारकाला पालकमंत्री मा. ना. जयकुमारजी गोरे यांनी केले अभिवादन

सांगोला ; तालुका प्रतिनिधी 

सांगोला तालुक्याचे कार्यातपस्वी आमदार स्व काकासाहेब साळुंखे पाटील आणि भागवतभक्त स्व. शारदादेवी साळुंखे पाटील यांच्या स्मारकाला राज्याचे ग्रामविकास मंत्री आणि सोलापूर जिल्ह्याचे पालकमंत्री मा. ना. जयकुमारजी गोरे यांनी भेट देऊन त्यांच्या स्मृतीला अभिवादन केले. यावेळी माजी आमदार दिपकआबा साळुंखे पाटील, भाजप नेते बाळासाहेब एरंडे, ॲड सचिन देशमुख, ॲड यशराजे साळुंखे पाटील, नूतन सभापती पूनम इंगवले, नवनाथ मगर, माजी सभापती बाळासाहेब काटकर, चंद्रकांत चौगुले, पंचायत समिती सदस्य बापू जावीर, प्रशांत वलेकर जवळा गावचे सरपंच सज्जन मागाडे आदीसह मान्यवर उपस्थित होते. 

पालकमंत्री मा. ना. जयकुमारजी गोरे हे रविवार दि २९ रोजी आपल्या नियोजित सांगोला दौऱ्यावर आले होते. यावेळी त्यांनी जवळा येथील कार्यतपस्वी आमदार काकासाहेब साळुंखे पाटील व भगवतभक्त स्वर्गीय शारदादेवी साळुंखे पाटील यांच्या स्मारकास भेट देऊन अभिवादन केले. यावेळी त्यांनी स्वर्गीय काकासाहेब साळुंखे पाटील यांच्या आठवणींना उजाळा दिला. सांगोला तालुक्याच्या विकासासाठी स्वर्गीय काकासाहेब साळुंखे पाटील यांनी दिलेले योगदान सदैव स्मरणात राहील, सांगोला तालुक्याच्या शाश्वत आणि दीर्घकालीन विकासाचे स्वप्न डोळ्यासमोर ठेवून स्व काकासाहेबांनी सांगोला तालुक्यातील शेती, सहकार आणि शिक्षण क्षेत्रात आपले भरीव योगदान दिले. त्याचबरोबर भगवतभक्त स्व. शारदादेवी साळुंखे पाटील यांनी सांगोला तालुक्याला एक आध्यात्मिक संस्कार देऊन खऱ्या अर्थाने तालुक्यात वारकरी संप्रदायाचा अध्यात्मिक विचार रुजवला असेही यावेळी पालकमंत्री मा. ना. जयकुमारजी गोरे यांनी स्पष्ट केले. 

चोपडी -रानमळा येथे ३१ मार्च ते ३ एप्रिल २०२६ या कालावधीत श्री. भोजलिंग यात्रा महोत्सवाचे आयोजन.

 चोपडी -रानमळा येथे ३१ मार्च ते ३ एप्रिल २०२६ या कालावधीत श्री. भोजलिंग यात्रा महोत्सवाचे आयोजन.

सांगोला/ प्रतिनिधी:( दशरथ बाबर): चोपडी (रानमळा) तालुका. सांगोला येथे मंगळवार दिनांक ३१ मार्च ते ३ एप्रिल २०२६ या कालावधीत श्री. भोजलिंग यात्रा महोत्सवाचे आयोजन करण्यात आले आहे. श्री भोजलिंग यात्रेनिमित्त मंगळवार दिनांक ३१ मार्च २०२६ रोजी सायंकाळी ७ वाजता आरती व महाप्रसादाच्या कार्यक्रमाचे आयोजन केले आहे. रात्री ८ वाजता श्री. संदीप मोहिते महाराज व अतुल हातेकर महाराज यांचा भारुडाची जुगलबंदी कार्यक्रम आयोजित केला आहे.

 बुधवार दिनांक १ एप्रिल २०२६ रोजी सकाळी ८ वाजता सासनकाठीची गावातून मिरवणूक काढण्यात येणार आहे. सायंकाळी ७ वाजता आरती व महाप्रसादाचा कार्यक्रम होईल. रात्री ८ वाजता महिलांसाठी व पुरुषांसाठी संगीत खुर्चीचे आयोजन करण्यात आले आहे. यासाठी भव्य बक्षिसांचे आयोजन केले आहे. महिलांसाठी होम मिनिस्टर कार्यक्रम आयोजित केला आहे. तर महिला व पुरुषांसाठी रस्सीखेच स्पर्धा आयोजित केल्या आहेत.

 गुरुवार दिनांक २ एप्रिल रोजी सकाळी ८ वाजता धावण्याच्या स्पर्धा होणार आहेत .सकाळी ९ वाजता स्लो बाईक स्पर्धा होतील. संध्याकाळी ७ वाजता आरती व महाप्रसादाचा कार्यक्रम होईल. रात्री ८ वाजता सिद्धेश्वर संगीत भजनी भारुड मंडळ दहिवडी यांचा कार्यक्रम आयोजित केला आहे.

 शुक्रवार दिनांक ३ एप्रिल रोजी सायंकाळी ७ वाजता आरती व महाप्रसादाचा कार्यक्रम होईल. रात्री ८ वाजता भव्य खुला रेकॉर्ड डान्स स्पर्धेचे आयोजन केले असून या स्पर्धा लहान व मोठ्या गटात आयोजित केलेल्या आहेत. लहान गटासाठी अनुक्रमे ७ हजार रुपये ,५ हजार रुपये, ३ हजार रुपये बक्षिसे देण्यात येणार आहेत . मोठ्या गटासाठी अनुक्रमे २० हजार रुपये,१५ हजार रुपये ७ हजार रुपये, व ५ हजार रुपये असा बक्षीसांचा खजिना देण्यात येणार आहे.यात्रेच्या व कार्यक्रमाच्या संदर्भात अमोल बाबर  ९४२०५६१९५५ व राहुल बाबर ९७६३०४०९५८ या मोबाईल क्रमांकावर  संपर्क साधावा . श्री भोजलिंग यात्रा कमिटी चोपडी (रानमळा) व ग्रामस्थ यांनी या यात्रेचे आयोजन केले असून या कार्यक्रमासाठी भाविक- भक्त व स्पर्धकांनी मोठ्या संख्येने उपस्थित राहण्याचे आवाहन करण्यात आले आहे .

समर्थ संस्थेमार्फत जत येथे भाषण कला प्रशिक्षण वर्गाचे आयोजन

 समर्थ संस्थेमार्फत जत येथे भाषण कला प्रशिक्षण वर्गाचे आयोजन 

वाटंबरे: समर्थ बहुउद्देशीय विकास संस्थामार्फत'भाषण कला व संवाद कौशल्य' या वक्तृत्व विकास प्रशिक्षण कार्यक्रमाचे जत येथे 7 एप्रिल ते 10 एप्रिल या कालावधीत आयोजन करण्यात आले आहे. हे प्रशिक्षण घेण्यासाठी प्रशिक्षक म्हणून प्रसिद्ध लेखक,वक्ता व प्रभावी भाषण कला प्रशिक्षक मनीष काळे लाभले आहेत.    

              या प्रशिक्षण वर्गामध्ये भाषण कसे करावे,भाषणाची सुरुवात कशी करावी,आत्मविश्वास निर्माण करणे,भाषणासाठी विषय व मुद्दे कसे निवडावे,श्रोत्यांबद्दल माहिती,विषय,सादरीकरण ,भाषणाचे पाठांतर ,विशिष्ट भाषाशैली,भाषण रंगवणे,भारदस्त दमदार आवाज,प्रसंगावधान राखणे ,भाषणासाठी दिलेला वेळ पाळणे,भाषणाचा शेवट कसा करावा या सर्व संवाद भाषण कला व संवाद कौशल्याचा सराव व तयारी करून घेण्यात येणार आहे.त्याचबरोबर प्रात्यक्षिक व सराव मटेरियल उपलब्ध करून दिले जाणार आहे. यासाठी मर्यादीत जागा असून अत्यंत कमी व माफक प्रवेश फी आकारण्यात येणार आहे. प्रशिक्षणासाठी इच्छुक असणाऱ्यांनी दिगंबर साळुंखे 9049106853, मनीषा साळे 7385162037 व अभिलाषा कोडग 9359881452 यांच्याशी संपर्क साधण्याचे आव्हान समर्थ बहुउद्देशीय एका संस्थेमार्फत करण्यात आले आहे.

श्रीराम नवमी निमित्त वासुद येथे कुस्तीचा थरार; लाखोंच्या इनामांसह जंगी मैदान रंगले

 श्रीराम नवमी निमित्त वासुद येथे कुस्तीचा थरार; लाखोंच्या इनामांसह जंगी मैदान रंगले

श्रीराम नवमीच्या पावन पर्वानिमित्त वासुद येथे पारंपरिक मल्लविद्येचा भव्य सोहळा मोठ्या उत्साहात पार पडला. गुरुवार, दि. 26 मार्च 2026 रोजी दुपारी 4 वाजता सुरू झालेल्या या जंगी कुस्ती मैदानात शंभर रुपयांपासून ते तीन हजार रुपयांपर्यंतच्या अनेक लहान-मोठ्या कुस्त्या रंगल्या. एकूण सुमारे पाच लाख रुपयांचे इनाम मल्लांना वितरित करण्यात आल्याने संपूर्ण परिसरात कुस्तीचा जल्लोष पाहायला मिळाला.

या मैदानाचे प्रमुख आकर्षण ठरलेल्या तब्बल ₹1,00,000 इनामाच्या कुस्तीत नेपाळचे पैलवान देवा थापा यांनी हिमाचल प्रदेशच्या नदीम चौहान यांच्यावर मात करत विजेतेपद पटकावले. तसेच सांगलीचे पैलवान विशाल शेळके यांनी आटपाडीच्या रणजीत आगलावे यांच्यावर विजय मिळवत प्रेक्षकांची दाद मिळवली.इतर झालेल्या कुस्त्यांमध्ये खवासपूरचे अर्जुन चव्हाण यांनी म्हसवडच्या प्रसाद फुकळे यांचा पराभव केला. खवासपूरचे करण खटके यांनी दत्ता बोडरे यांच्यावर मात केली, तर पियुष वाडेकर (खवासपूर) यांनी आटपाडीच्या भैय्या खरात यांना चितपट केले.

       काही कुस्त्या अत्यंत चुरशीच्या ठरल्या. कामतीचे सुलेखान शेख व बामणीचे विनोद शिनगारे तसेच कुंभारीचे सुशांत शेजुळ व खवासपूरचे विकास निंबाळकर यांच्यातील कुस्त्या बरोबरीत सोडवण्यात आल्या, ज्यामुळे प्रेक्षकांनी समाधान व्यक्त केले.इतर निकालांमध्ये खवासपूरचे गणेश आवताडे यांनी आटपाडीच्या यश देवकते यांचा पराभव केला, तर मानेगावचे ज्ञानेश्वर सावंत यांनी खवासपूरच्या विकास कोळी यांच्यावर विजय मिळवला.

            या भव्य मैदानाचे आयोजन वासुद येथील जुने हायस्कूल मैदानावर करण्यात आले होते. तसेच लहान व मोठ्या कुस्त्यांचे सामने हनुमान मंदिर परिसरात दुपारी 1 वाजल्यापासूनच रंगले होते, ज्याला गावकऱ्यांचा उत्स्फूर्त प्रतिसाद लाभला.कार्यक्रमास वस्ताद कृष्णा शेंडगे (सर), दगडू चौगुले, बजवळकर बुवा बडरे, दादा व्हनमाने, सहदेव लेंडवे यांच्यासह अनेक मान्यवर उपस्थित होते. विशेष म्हणजे सांगोला पोलीस ठाण्याचे पोलीस निरीक्षक विनोद घुगे यांनी स्वतः आखाड्यात उतरून पंच म्हणून जबाबदारी पार पाडली. त्यांच्या सहभागामुळे कार्यक्रमाची शोभा अधिक वाढली.

        कुस्ती निवेदनाची जबाबदारी क्रीडा भूषण पुरस्कारप्राप्त पैलवान कृष्णा शेंडगे (सर) यांनी प्रभावीपणे पार पाडली. यावेळी सागर पाटील, यशराजे साळुंखे पाटील, अतुल पवार, योगेश खटकाळे, गुंडा दादा खटकाळे ,मोहन बापू आलदार, डॉ.शिवराज भोसले, डॉ.विजय बंडगर,डॉ.महेश राऊत,डॉ.महादेव जगताप यांच्यासह विविध क्षेत्रातील मान्यवर उपस्थित होते.

श्रीराम मंडळाचे सदस्य:

भीमराव सावंत, प्रकाश केदार, वसंतराव शिंदे, शहाजी पाटील, विठ्ठल नाना केदार, सुभाष शिंदे, पोपट भोरे, अरविंद केदार, राहुल भोरे, सुनील भोरे, दत्ता केदार, प्रकाश भोरे, सुनील केदार, अशोक गोरे, अशोक शास्त्री, गोपाळ मराळ, राहुल केदार, गोपी केदार, डॉ. निरंजन केदार, अंकुश सावंत, मधुकर पवार यांनी या कार्यक्रमाच्या यशस्वी आयोजनासाठी परिश्रम घेतले.

        एकंदरीत, वासुद येथील या भव्य कुस्ती मैदानाने श्रीराम नवमीचा उत्सव मोठ्या उत्साहात व दिमाखात साजरा करत पारंपरिक मल्लविद्येला नवे बळ दिले. गावकऱ्यांनी व परिसरातील कुस्तीप्रेमींनी मोठ्या संख्येने उपस्थित राहून या सोहळ्याला उत्स्फूर्त प्रतिसाद दिला.